भरतपुर महानगरमा रेणु र देवीको फाइनल प्रतिस्पर्धा

दिपेश कडरीया
नारायणगढ,१४ जेठ ।  स्थानीय तहको पहिलो निर्वाचन सम्पन्न भएको दुईसाता बितिसकेको छ । देशभरको मतपरिणाम आइसकेको छ । तर, अझै पनि भरतपुर महानगरको चुनावी सरगर्मी बाँकी नै छ । 
 
भरतपुर महानगरको २९ वडामध्ये अब १९ र २० वडामात्रै मतगणना बाँकी छ भने १९ नम्वर वडाको मतगनणा कार्य भइरहेको छ ।   यो समाचार
 तयार गर्दा सम्म  ५ हजार ५६२ मतमात्रै गणना गर्न बाँकी छ । २७ वटा वडाको मतगणना सकिँदा माओवादी केन्द्रकी रेणु दाहालले ४० हजार ४३७ मत पाएकी छन् भने एमालेका देवी ज्ञवालीले ४१ हजार २०१ ल्याएका छन् । आइतबार राती ९ बजे सम्म मा  १९ नम्बर वडाको मतपरिणाम आउँदासम्म मतान्तर ७६४ रहेको थियो ।  
 
रेणु दाहालले शनिबारदेखि निरन्तर रुपमा मतान्तर घटाउँदै आएकी छन् । यतिबेला भरतपुर महानगरको फाइनल प्रतिस्पर्धामा कसले बाजी मार्ला भनेर विश्लेषण गर्न गाह्रो परेको छ ।
 
कांग्रेसको समर्थनबाट साझा उम्मेदवारका रुपमा प्रस्तुत भएकी रेणुले कांग्रेसका आधार क्षेत्र मानिएका वडाहरुबाट अपेक्षित मत हासिल गर्न नसक्दा निरन्तर रुपमा देवी ज्ञवालीले अग्रता लिएका छन् । तर, पछिल्लो मतगणना भएका वडा र त्यसले रेणुलाई दिलाएको मत हेर्दा कसले बाजी मार्ला भनेर अहिल्यै अनुमान गर्नु छिटो हुने देखिन्छ । 
 
 
उसो त अब मतगन्न बाँकी रहेका दुई वडा कांग्रेसले वडाध्यक्ष जित्ने वडाहरु मानिन्छन् । तर, वडा नं १९ मा आफूले जित्ने एमालेको पनि दाबी छ ।
 
कांग्रेसले माओवादी उम्मेदवार रेणुलाई दिएको मत र देवीले पाएको मतको फैसला गर्ने मतपेटिकाले नै हो । अब मतगणना हुन ५ हजार ५६२ मत बाँकी रहँदा देवीको अग्रता ७६४ रहनुले एमालेलाई पनि ढुक्क हुने अवस्था देखिँदैन । 
 
कांग्रेसले आफ्नो उम्मेदवारमात्रै उठाए पनि कांग्रेस भारी मतसहित विजयी हुने हुँदा रेणुलाई कांग्रेसको ६० देखि ७० प्रतिशत मत गए पनि उनको विजय सुनिश्चित हुने विष्लेषण गर्न सकिन्छ ।

---