मोर्चा मधेश बन्दको आव्हान गर्दै सडकमा

संविधान संशोधन नगरी सरकारले आगामी बैशाख ३१ गते स्थानीय तहको निर्वाचन घोषणा गरेको भन्दै मधेसी मोर्चाले आज मधेस बन्द आव्हान गरेको छ । नेता कार्यकर्ता सडकमा सरकार विरुद्ध नाराबाजी गर्दै टायर बालेर मोर्चा विरोध प्रदर्शनमा जुटेका छन् । मधेशका सबै जिल्ला सदरमुकाम र शहर चोकमा विरोध प्रदर्शन भइरहेको जनाईएको छ । लामो समयपछि मधेश आज पुनः ठप्प भएको छ ।
मधेस बन्दका कारण तराईका केहि स्थानहरुमा जनजीवन प्रभावित भएको बुझिएको छ । यस अघि हिजो साँझ सरकारले आगामी बैशाख ३१ गते स्थानीय तह निर्वाचन गर्ने घोषणा गरे लगत्तै मधेसी मोर्चाले आन्दोलनका कार्यक्रम सार्वजनिक गरेको हो ।
संशोधन अघि चुनावको औचित्य नभएको भन्दै चुनाव घोषणा गरेर मधेसलाई द्वन्द्वमा धकेल्ने काम भएको मोर्चाको आरोप छ ।मोर्चाले आज मधेस बन्द गर्ने घोषणा गरेको छ भने मोर्चाले विज्ञप्ति जारी गर्दै बिहीबारदेखि १५ दिनसम्म गाउँगाउँमा भन्डाफोर कार्यक्रम पनि सञ्चालन गर्ने जनाएको छ ।

---