सिभिल बैंकले एकै पटक डाक्यो दुई वर्षको साधारण सभा
१४.३० प्रतिशत लाभांश वितरण गर्ने प्रस्ताव

सिभिल बैंक लिमिटेड (CBL)ले बैशाख २७ गते शुक्रबार साधारणसभा आह्वान गरेको छ  । बैंकले  एकैदिन आर्थिक वर्ष २०७३/७४ र २०७४/७५ को साधारणसभा गर्न लागेको हो । अमृतभोग डिल्लीबजारमा बिहान ११ बजे सातौ र आठौ साधारण सभा आह्वान गरेको हो ।
साधारणसभाले आर्थिक वर्ष २०७३ र ७४ को मुनाफाबाट १०.२५ प्रतिशत बोनस शेयर र तथा ०.५४ प्रतिशत नगद लाभांश वितरण गर्ने प्रस्ताव पारित गर्ने छ । त्यस्तै आर्थिक बर्ष ७४ र ७५ को मुनाफाबाट ४.०५ प्रतिशत नगद लाभांश गरि कूल १४.३० प्रतिशत लाभांश वितरण गर्ने प्रस्ताव पनि सभामा पेश हुनेछ । बैंकले लाभांश र साधारण सभा प्रयोजनका लागि बैशाख १० गते मंगलबार देखि शेयरधनी दर्ता किताब बन्द गर्दैछ । बैशाख ९ गतेसम्म कायम शेयरधनीले मात्र साधारणसभामा भाग लिन र लाभांश प्राप्त गर्न सक्ने छन ।
मर्जर र एक्विजिसनको लागि आवश्यक पर्ने सम्पूर्ण कार्य गर्नको लागि संचालक समितिलाई अख्तियारी दिने प्रस्ताव पनि साधारणसभामा पेश हुनेछ । त्यस्तै सभाले  संस्थापक र साधारण शेयरधनीको तर्फबाट ३ र ३ जना गरि ६ जना सञ्चालक निर्वाचन गर्ने, बैंकको प्रबन्धपत्र तथा नियमावली संसोधन, लेखापरिक्षक नियुक्ति र पारिश्रमिक निर्धारण गर्ने  लगायतका  बिषयहरु मुख्य एजेण्डा  रहेका छन् । हाल बैंकको चुक्ता पुंजी ७ अर्ब २५ करोड ९३ लाख रहेकोमा प्रस्तावित लाभांश वितरणपछि बैंकको चुक्ता पुंजी ८ अर्ब नाघ्ने छ  । 

---